ფარული თვალთვალი სათვალიდან?

წარმოიდგინეთ, რომ პარკში სეირნობთ, ზღვის სანაპიროზე ისვენებთ ან სპორტულ დარბაზში ვარჯიშობთ. თქვენს გარშემო უამრავი ადამიანია, მათგან ნაწილს კი ჩვეულებრივი, მოდური სათვალე უკეთია. თუმცა, შესაძლოა, ეს სულაც არ იყოს უბრალო აქსესუარი. დღეს ხელოვნური ინტელექტის მქონე ჭკვიან სათვალეებს  შეუძლიათ სრულიად ფარულად გადაგიღონ ფოტო, ჩაიწერონ თქვენი პირადი საუბარი ან პირდაპირ სოციალურ ქსელში გაუშვან ვიდეოსტრიმი -  ისე, რომ თქვენ ამის შესახებ ეჭვიც კი არ გქონდეთ.

ტექნოლოგიების ასეთმა სწრაფმა განვითარებამ მსოფლიო ახალი, სერიოზული გამოწვევის წინაშე დააყენა. ნორვეგიის მთავრობამ უკვე გადადგა პირველი მკაცრი ნაბიჯი და პარლამენტს ოფიციალური წინადადებით მიმართა, რათა საზოგადოებრივ სივრცეებში AI სათვალეების გამოყენება დროებით აიკრძალოს.

სად გადის ზღვარი?

ნორვეგიის ხელისუფლება მიიჩნევს, რომ პრივატულობა უპირველესი ღირებულებაა. სწორედ ამიტომ, დროებითი აკრძალვა პირველ რიგში შეეხება იმ ადგილებს, სადაც პირადი სივრცის დაცვა კრიტიკულად მნიშვნელოვანია: სამედიცინო დაწესებულებებს, ფიტნეს ცენტრების გასახდელებსა და საშხაპეებს. განსაკუთრებული ყურადღება ეთმობათ ბავშვებს, რის გამოც სათვალეების ტარება შეიზღუდება სკოლებში, ბაღებში, სათამაშო მოედნებსა და ახალგაზრდულ კლუბებში.

თუმცა, შეზღუდვების არეალი ამით არ შემოიფარგლება. ის შესაძლოა გავრცელდეს:

• საკონცერტო და სპორტულ სივრცეებზე

• პარკებზე, სანაპიროებსა და მუზეუმებზე

• დიდ სავაჭრო ცენტრებზე, მოლებზე

ნორვეგიის მთავრობაში განმარტავენ, რომ ეს არ არის ტექნოლოგიის სრული ბლოკირება. სათვალეების გამოყენება კვლავ ნებადართული იქნება სახლში ან კერძო საკუთრებაში. ეს პაუზა ხელისუფლებას მისცემს დროს, რათა ზუსტად განსაზღვროს, თუ როგორ დაარეგულიროს  მოწყობილობები ისე, რომ არ შეილახოს ადამიანების უფლებები.

მოდური ბრენდები გაყიდვიდან იხსნება

კომპანია Meta, რომელიც ცნობილ ბრენდ Ray-Ban-თან ერთად აქტიურად ყიდის ხელოვნური ინტელექტის მქონე სათვალეებს, ირწმუნება, რომ მოწყობილობაზე დამონტაჟებული პატარა ნათურა გარშემომყოფებს ანიშნებს, როდესაც ვიდეოჩაწერა მიმდინარეობს. მეტიც, თუ ვინმე ამ ნათურას თითს ან სტიკერს ააფარებს, კამერა ავტომატურად ითიშება.

მიუხედავად ამ გარანტიებისა, საზოგადოებრივი უნდობლობა იმდენად დიდია, რომ ბიზნესმა უკვე დაიწყო რადიკალური ზომების მიღება:

• ევროპაში: ნიდერლანდების ოპტიკის გიგანტმა Hans Anders-მა სრულად შეაჩერა Ray-Ban Meta-ს სათვალეების გაყიდვა მანამ, სანამ პოლიტიკური დებატები არ დასრულდება.

• დიდ ბრიტანეთში: კინოთეატრების ასოციაციამ (UK Cinema Association) მკაცრად აკრძალა კამერიანი ჭკვიანი სათვალეების ტარება დარბაზებში, რათა დაიცვან მაყურებლების პირადი სივრცე და თავიდან აიცილონ ფილმების პირატული ჩაწერა.

წყარო: Associated Press